Nova edituro di mea diserturo

Kelka monati ante nun me komencis tradukar mea diserturo dil quaresma yaro universitatala (ol esas diplomala laborajo) en Ido. Pro ke me ne esis tote kontenta kun la qualeso, me korektigis ol plurafoye. Hodie me adkargis nova versiono ed esperas ke ol esas nun definitiva.

La titulo esas "Bankala relati duriva e barili informala" ed ol traktas la financizo di entraprezi. Vu povas deskargar ol hike o per la ligilo en la dextra rubriko. Me adjuntas la rezumo hike por refero.

Rezumo:
Ca skriburo probas explikar quale la bankala relati duriva influas la konkurenco inter la banki. Ni vidos ke ca klientala relati provokas des-simetreso informala, qua povos konstitucar barili informal ed impedar konkurencanti potencial enirar la merkato. Pluse ni studios l'impliki por l'aceso a kredito.

Usana konsumanto-fido kreskas

Usana konsumanto-fido atingis en decembro la maxim alta nivelo de ante la uragano "Katrina". La indexo dil konsumanto-fido atingis 103,6 en decembro (98,3 en novembro). Ol esis proxim la expekto di 103,1 da ekonomikisti questionita da MarketWatch.
fonto: MarketWatch

Europana borsi atingas maxim alta nivelo de 45 monati

Europana acioni atingis sua maxim alta nivelo de 45 monati ye la unesma dio di kambio pos la Kristnaskala pauzo. La volumino esis kompreneble basa.

La indexo FTSE Eurofirst 300 kreskis 0,3% por atingar 1'279,60. Xetra Dax kreskis 0,5% por atingar 5'444,84. La CAC 40 en Paris kreskis 0,2% til 4'769,38.

Nikkei kreskas

La Japoniana Nikkei-indexo atingis sua maxim alta nivelo de kin yari. La indexo kreskis 1,04 po cent ed atingis 16'108 punti. Pozitiva expekti en la endetala komerco esis la precipua kauzo di la plu-altigo. Anke la borsi en Taiwan, Hongkong, Singapur e Sud-korea kreskis.

Kontenaji

Quala kontenajin vu povos lektar hike? Maxim probable mikra komenti pri teorii, financala libri ed evidente la aktualajo ekonomiala e financala. Financala merkati ed instrumenti, same kam makro-ekonomiko interesas me maxim multe. Do expektez lektar pri instrumenti derivita (exemple: *opcioni, *swapi, *futuraji e *komoditaji), o pri la borsi plu generale, e la pekuniala politiko dil banki centrala.

Esez bon-venanta!

Hola! Hike naskis nova blogo en la linguo internaciona Ido. Pro ke me ne plus havas multa tempo por okupar me pri lingui, me decidis skribar blogo pri temi quin me omnakaze bezonas traktar singladie. Tale eventas ke nun vu povas lektar pri ekonomiko e financo en nia linguo. Evidente la terminologio en ta faki kreskegis e semblas a multi ke nur en la Angla linguo on povas serioze traktar ta faki. Esas justa ke la Angla linguo semblas tre apta por la uzado en ekonomiko e financo, ne nur pro ke ol posedas vorto-trezoro admirinda (ol ya venas de la fakto, ke la Angla esas de facto la lingua franca en ta faki), ma anke pro ke ol sucesas tre ofte trovar sat kurta vorti. Tamen me volas montrar ke nia linguo internaciona anke sucesas expresar omna idei di la homi ed esas apta linguo en omna domeni imaginebla.